XIINXALA LOOGA BOORANAA SAGALEE-JECHAARRATTI XIYYEEFFATE

Kaayyoon Gooroo qorannoo kanaa, Looga Booranaa sadarkaa sagalee hanga jechaatti jiru xiinxaluudha. Kaayyoo kana fiixa baasuuf, mala akkamtaatti dhimma kan bahame yoo ta’u, miti carraa keessaa tooftaa iddatteessuu akkayyootti fayyadamee jira. Ragaaleen qorannichaaf barbaachisan ga’eessota 18, Mangoddoota 18 irraa mala afgaaffiin, garee abbootii gadaa mala marii garee xiyyooffannootiin akkasumas muuxannoo dirreetiin walitti qabaman. Ragaaleen kunis, mala qaaccessa akkamtaa rogsadeessuutiin fayyadamuun, qabiyyeewwan garaagaraa jalatti qooduun qaacceffame. Argannoowwan qorannichaa akka agarsiisutti looga Booranaa keessatti jechoota sagalee dheeraan xumuraman gabaabsuun kanneen sagalee gabaabaan xumuraman immoo irraa haquun yeroo itti fayyadamu, jecha isa dursee dhufe irraa dhamsaga dubbachiiftuu yookiin birsaga dhumaa haquun waliiti fidee jechoota lama akka jecha tokkootti dubbachuu, loogni sadarkaa sagaleetti mul’atu heddummina qabaachuu, loogni kun jechootaan sooressa ta’uufi jechootni daran eenyummaafi duudhaa hawaasichaa ibsan dagatamaa deemuun adda baheera. Kanaaf,hayyootni garaagaraa looga kanatti dhimma bahuun hojiilee saayinsiis ta’ee, ogbarruu barreeffamaa kanneen akka Og-walaloo, Asoosamaafi Diraamaa(Weeshoo) ittiin qopheessuun abbaa kanaafis ta’ee uummata Oromoo maraaf dhiyeessuu, Biiroon Barnoota Oromiyaa sirna barnoota Afaan Oromoon kennamus ta’ee, barnoota Afaan Oromootiin kennamu qopheessuu keessatti jechoota looga kanaatiif xiyyeeffannoo kennuun sirnicha keessatti hammachiisanii qopheessuufi Waajjirri Aadaafi Turizimii Aanalee godina Booranaafi kan sadarkaa Godina Booranaa, barsiisotni Afaan Oromoo hawaasicha keessatti hojjatanis ta’ee kanneen haalli isaanii mijatu hawaasichi abbaan loogaa jechoota kanaafi ergaa isaan baatan osoo hin harca’in akka itti fayyadamu taasisuufi jajjabeessuun akkasumas, bifa walfakkaatuun hubachiisuun akka yabootti eeramanii jiru. 6