Xiinxala Ergaa Geerarsa Dinagdee Oromoo Jimmaa Jaawwii

Kaayyoon qorannoo kanaa ergaa geerarsota dhimma dinagdee xiinxaluun addeessuudha. Maddeen ragaalee qorannichaas maddeen ragaalee tokkoffaa yoo ta’an, tooftaalee funaansa ragaalee keessas daawwannaa, afgaaffiifi marii gareetti dhimma ba’amuun ragaaleen funaannatamaniiru. Ragaaleen funaanamanis mala akkamtaa ibsaan xiinxalaman jiru. Argannoon qorannoo kanaas dargaggeessi tokko osoo hinfuudhiin dinagdeedhaan ofdanda’uun akka barbaachisu mul’isa. Akkasumas, namni hojiitti cimaa hintaaneefi hiyyummaa injifachuu hindandeenye hawaasa naannoo isaan akka tuffatamu, qorqalbiifi hariiroon inni hawaasa waliin qabu kufaa ta’uu mul’isa. Kana malees hiyyummaan carraa osoo hintaane hojjechuu dhabuu irraa akka dhufuufi namni hojjete kamuu hiyyummaa keessaa ba’uu akka danda’amu agarsiisa. Kana malees, geerarsota dhimma dinagdee keessatti dhiibbaa sirni garboonfataa Oromoo Maccaa irraan ga’aa tureefi sun ammoo hiyyummaaf akka isaan saaxiletuu ibsamee mul’ata.  Kanarraa kan ka’e, Oromoon hiyyummaafi gadadoof akka saaxilame; hiyyummaan kabaja namummaa kan namarraa muulqu diina guddaa ilma namaa akka taateefi Oromoonis sababa hiyyummaa kabajaafi ulfina dhabee qe’ee isaatti salphatee jiraachaa akka ture agarsiisa. Jornaalii Dilbii Qorannoo - Journal of Accumulated Knowledge Resources , Vol. 1 No. 2 (2023): Joornaalii Dilbii Qorannoo (JDQ) Volume 1 Issue 2