Xiinxala Sirna Maqbaasa Ilma Angafaa Oromoo Booranaa

Qorannoon kun, adeemsa raawwii sirna maqbaasa ilma angafaa Oromoo Booranaa irratti xiyyeeffate. Sababni xiyyeeffatameefis, qaawwii qorannoo jiraachuu; beekumsi natoo ganamaa hawaasichaa sirna maqbaasa ilma angafaa keessan calaqqisiifaman qoratamuun barreeffamaan olkaa‟amuu dhabuudha. Saxaxni qorannichaa, xiinxala yoomessahaa ibsaati. Akaakuun qorannichaa immoo qorannoo akkamtaa ta‟ee, sanyabsaadha. Maddi ragaalee qorannichaa, madda ragaa tokkoffaati. Tooftaa ragaaleen ittiin funaanaman, daawwannaa hirmaachisaafi afgaaffii yoo ta‟an, ragaaleen immoo, dabtara yaadannoo dirreefi viidiyoo kaameraatiin galmeeffaman. Ragaaleen tooftaa kanaan guuraman, mala ibsaatiin xiinxalaman. Ragaalee xiinxalaman irraa bu‟aan argame: Sirni maqbaasa ilma angafaa jila gubbisaan raawwatama. Innis, gogeessa gadaa abbaa daa‟imaa irratti hundaa‟uun gubbisaa ilmaan kormaafi imaan jaarsaa jedhamee beekama. Gubbisni ilmaan kormaa gogeessa gadaa tokko keessatti altokko qofa kan raawwatamu yoo ta‟u, kan ilmaan jaarsaa, yoomessa ayyaanni eeyyamu kamillee gaggeeffamuu danda‟a. Haala kana keessatti, raawwileen sirna dura raawwataman- ayyaana heduu, jila beeksisuu, uffata, nyaataafi mukeen aadaa qopheessuudha. Yeroon sirnaa immoo guyyaa sadiif kan gaggeeffamu yoo ta‟u, guyyaa jalqabaa, mukaafi buuyyoo dhiheessuu; guyyaa lammaffaa, galma dongoruun ijaaruu; guyyaa sadaffaa, galma afaan gooduun maqaa baasuudha. Sirna booda, sangaa jila qaluun erga ariirratanii booda handhuurraa bobbaasuun jila obbaasu. Maqaaleen jila kanaan ilma angafaaf moggaaffaman immoo, maqaalee akka aadaatti beekaman: Liiban, Boruu, Areeroo, Diida, Dhadacha, Guyyoo, Nuurtuu, Soraa, Waaqoofi Dooyyoodha. Akkasumas, ilmi angafni osoo akaakuun lubbuun jiruu sirni maqbaasaa yoo gaggeeffameef, maqaa akaakuutu moggaaffamaafi. Haala kana keessatti, yoo akaakuun maqaa maandhaa qabaate, ilma angafaaf maqaan maandhaa kan moggaaffamuuf ta‟a. Maqbaasni kunimmoo falaasama, dinagdee, hawaasummaa, aadaa, safuufi safeeffannaa uumaafi uumamaa hawaasichaa kan ibsuudha. Kanaaf, mootummaafi qorattootni kallattii garagaraan qorachiisuufi qorachuun barreeffamaan olkaa‟uu feesisa. Hawaasichis aadaa maqbaasaa isaa kana kunuunfachuun haala asilummaa isaa eegeen dhalootaa dhalootatti dabarsuun gaarii ta‟a.